Romaría de Santa Marta de Ribarteme

Esta peculiar celebración é coñecida mundialmente polo estraño modo que teñen os devotos de realizar as promesas relixiosas. Cando algunha persoa, algún familiar ou achegado padeceu ou padece algunha enfermidade ou situación na que a súa vida correu perigo, os devotos déixanse levar pola súa fe e encoméndanse a esta Santa para que os salve. O fervor pola súa imaxe reflíctese ao longo de toda a comitiva. Santa Marta, irmá do resucitado Lázaro, é considerada polos crentes como a avogada dos que están en perigo de morte e a ela acoden dúcias de oferentes que acompañan a procesión. A rareza das promesas reside en que para realizalas, as persoas introdúcense nos cadaleitos, vivas, e percorren deste xeito o trazado da procesión. No caso dos nenos, os cadaleitos sempre van baleiros, aínda que hai constancia de que antigamente os cadaleitos infantís eran transportados polos mesmos nenos. A procesión é seguida por outros penitentes que, en caso de non querer ser transportados en cadaleito, cobren as súas roupas cunha gasa branca e camiñan portando unha vela tras a imaxe da Santa que tamén acompaña aos féretros durante a procesión. Santa Marta leva a man dereita alzada en sinal de protección cara a aqueles que conseguiron escapar da morte, feito que os fieis compensan achegando diversas ofrendas económicas.