As redeiras

Tecer e arranxar as redes cando volvían do mar era, e segue a ser, un traballo maioritariamente feito por mulleres: as redeiras. Estas persoas realizan un labor tradicional, manual e altamente cualificado que se desenvolve desde a aparición das redes e continúa a facerse, con moitos cambios, a día de hoxe. Os barcos que chegan a porto descargan as redes deterioradas e recollen aquelas que xa foron reparadas para volver saír pescar. Sen a actividade das redeiras, os labores de pesca non se poderían levar a cabo e é, hoxe en día, unha das actividades tradicionais relacionadas co mar que aínda se conservan con vitalidade.